Lög Borgarahreyfingarinnar

I. KAFLI: Heiti og tilgangur.
II. KAFLI: Félagsaðild.
III. KAFLI: Aðalfundur.
IV. KAFLI: Stjórn.
V. KAFLI: Félagsfundur.
VI. KAFLI: Vinnuhópar og málefnasvið.
VII. KAFLI: Frambjóðendur.
VIII. KAFLI: Þinghópur.
IX. KAFLI: Starfsfólk.
X. KAFLI: Fjárreiður.
XI. KAFLI: Almenn ákvæði.
XII. KAFLI: Félagsslit.
XIII. KAFLI: Lagabreytingar.

I. KAFLI

Heiti og tilgangur
1. grein. Heiti.

1.1. Félagið heitir Borgarahreyfingin og er starfsvæði þess Ísland. Heimili Borgarahreyfingarinnar og varnarþing er í Reykjavík.

2. grein. Tilgangur.

2.1. Tilgangur Borgarahreyfingarinnar er að ná fram lýðræðisumbótum á Íslandi, með virkri þátttöku borgaranna, valddreifingu, gegnsæi og því að menn sæti ábyrgð. Þessari grein má einungis breyta með einróma samþykki aðalfundar.

2.2. Tilgangi sínum hyggst Borgarahreyfingin ná fram með laga- og stjórnarskrárbreytingum sem miða að gagngerri endurskoðun á íslenskri stjórnskipan og kosningalöggjöf. Til að ná fram markmiðum sínum mun hreyfingin bjóða fram til alþingis– og eða sveitarstjórnarkosninga.

II. KAFLI

Félagsaðild
3. grein. Félagsaðild.

3.1. Aðild að félaginu getur hver einstaklingur fengið sem styður stefnu hreyfingarinnar, er sammála tilgangi hennar og samþykkir að starfa eftir þessum lögum. Sé umsækjandi í öðrum stjórnmálahreyfingum skal hann geta þess við umsókn.

3.2. Nýjum aðildarfélaga er send staðfesting um inngöngu hans í Borgarahreyfinguna með tölvupósti frá skrifstofu hreyfingarinnar, sem jafnframt heldur félagaskrá. Óheimilt er að láta utanaðkomandi aðilum í té félagaskrá.

3.3. Félagar Borgarahreyfingarinnar eru grundvöllur alls valds í hreyfingunni.

III. KAFLI

Aðalfundur og auka-aðalfundur
4. grein. Aðalfundur.

4.1. Aðalfundur hefur æðsta vald í öllum málum Borgarahreyfingarinnar.

4.2. Til að tryggja daglega starfsemi hreyfingarinnar felur aðalfundur handhöfum, eins og skilgreint er í lögum þessum, hluta síns valds á milli aðalfunda. Til að tryggja að handhafar þess valds muni aðeins nota það til að ná tilgangi hreyfingarinnar þarf valdsvið þeirra að vera skýrt afmarkað, valdbeiting þeirra að vera gegnsæ og valdheimild þeirra að vera afturkallanleg.

4.3. Aðalfundur skal haldin í september ár hvert. Aðalfundur er löglegur ef til hans er sannanlega boðað með sex vikna fyrirvara. Í aðalfundarboði skal koma fram dagskrá fundar og breytingartillögur á lögum þessum sem leggja á fyrir fundinn. Á aðalfund skal sannanlega leitast við að boða alla félagsmenn hreyfingarinnar.
Félagaskrá skal prentuð út sem kjörskrá og henni lokað þegar fundarboð er sent út. Auk seturéttar á aðalfundi hafa allir félagsmenn málfrelsi, tillögurétt og atkvæðisrétt. Á aðalfundi skal leitast við að ná sameiginlegri niðurstöðu um helstu mál en komi til atkvæðagreiðslu ræður meirihluti í öllum málum, fyrir utan breytingum á lögum þessum sem þurfa samþykki að minsta kosti 2/3 fundargesta sbr. grein 17.1.

4.4. Dagskrá aðalfundar skal vera:

1. Kosning fundarstjóra.
2. Skýrsla stjórnar.
3. Skýrsla landshlutahópa
4. Lagabreytingar.
5. Stjórnarkjör.
6. Endurskoðaðir reikningar lagðir fram til samþykktar.
7. Kjör tveggja skoðunarmanna reikninga.
8. Önnur mál.
9. grein. Auka-aðalfundur.

5.1. Auka-aðalfundur er löglegur ef til hans er sannanlega boðað með tveggja vikna fyrirvara. Til auka-aðalfundar skal boða óski 10% félagsmanna þess, þriðjungur stjórnar eða þriðjungur þinghóps, þó ekki færri en tveir. Reglur um auka-aðalfund eru samhljóðandi reglum um aðalfund nema óheimilt er á auka-aðalfundi að breyta lögum þessum. Dagskrá auka-aðalfundar tekur breytingum eftir því til hvers hann er boðaður. Sé auka-aðalfundur boðaður vegna vantrauststillögu á stjórn skal skipta út liðnum “Stjórnarkjör” fyrir liðinn “Vantrauststillaga á stjórn.” Sé vantrauststillagan samþykkt skal haldinn auka-aðalfundur að sex vikum liðnum til að kjósa nýja stjórn. Eina verk fráfarandi stjórnar skal vera skipulagning aukaaðalfundar.

IV. KAFLI

Stjórn
6. grein. Stjórn.

6.1. Aðalfundur felur stjórn Borgarahreyfingarinnar eftirfarandi hlutverk og valdsvið, en þó með þeim takmörkunum sem lög þessi geyma:

6.1.1. Stjórn er ábyrg fyrir daglegum rekstri hreyfingarinnar, fyrir því að halda félagsmönnum og borgurum landsins upplýstum um starfsemi hreyfingarinnar og sjá til þess að hreyfingin sé starfhæf. Stjórn hefur vald til þess að reka skrifstofu og ráða starfsfólk sbr. grein 13.

6.1.2. Stjórn skal bera ábyrgð á fjárreiðum Borgarahreyfingarinnar, skuldbindingum hennar og fullnustu þeirra. Almennir félagsmenn skulu ekki bera ábyrgð á fjárreiðum eða rekstri hreyfingarinnar. Firmaritun hreyfingarinnar er í höndum meirihluta stjórnar, og er takmörkum háð sbr. grein 14.

6.1.3. Ef stjórn telur að þingmenn eða aðrir meðlimir hreyfingarinnar gangi gegn stefnu hreyfingarinnar, skal stjórnin sannanlega boða til félagsfundar með fjögurra vikna fyrirvara og reyna eins og hægt er að viðkomandi félagsmaður geti sótt fundinn til að útskýra afstöðu sína. Eftir að viðkomandi félagsmaður hefur útskýrt sitt mál getur hver félagsmaður lagt málið í dóm fundarins sem skal taka til þess afstöðu sbr. grein 8.1.4.

6.2. Á aðalfundi skulu kjörnir sjö fulltrúar í stjórn og sjö til vara til eins árs í senn. Hver félagsmaður skrifar nöfn allt að sjö frambjóðenda til stjórnar á kjörseðil. Atkvæði skulu talin fyrir opnum tjöldum. Þeir sjö sem hljóta flest atkvæði skulu teljast rétt kjörnir í stjórn. Næstu sjö að atkvæðavægi taka sæti í varastjórn. Stjórnin kýs sér formann, varaformann, ritara og gjaldkera. Allir félagsmenn geta gefið kost á sér til setu í stjórn. Til að tryggja skiptingu valdsins innan hreyfingarinnar skulu stjórnarmeðlimir ekki sitji á þingi. Stjórnarseta skal vera launalaust sjálfboðastarf án nokkurra fríðinda.

6.3 Öllum félögum í borgarahreyfingunni skal tryggt að geta kosið til stjórnar á aðalfundi, hvar á landi sem þeir búa. Skal það gert meðal annars á eftirfarandi hátt: Með utankjörsfundaratkvæðagreiðslu eða fjarkosningu/netkosningu sem að standa landsbyggðarfélög Borgarahreyfingarinnar Utankjörfundaratkvæðagreiðslu skal framkvæma með útsendingu atkvæðaseðla frá skrifstofu hreyfingarinnar eða sambærilegu aðgengi flokksmanna að kjörseðli á heimasíðu hreyfingarinnar sem félagsmenn á landsbyggðinni geta prentað út sem og aðrir félagsmenn sem ekki geta sótt aðalfund.

Fjarkosningu skal meðal annars framkvæma á eftirfarandi hátt:
Hvert landsbyggðarfélag Borgarahreyfingarinnar getur haldið fund á sama tíma og aðalfundur fer fram og frá þeim fundi sýnt með fjarfundarbúnaði á aðalfund og öfugt. Hvert landsbyggðarfélag heldur atkvæðagreiðslu á sama tíma og atkvæðagreiðsla á aðalfundi fer fram. Hvert félag heldur síðan utan um atkvæðatalningu og tilkynnir útslit hennar til aðalfundar um leið og talningu er lokið. Netkosning skal vera raunhæfur möguleiki ef og þegar tölvutæknin og netið hafa þróast með þeim hætti að kostnaður og fyrirhöfn við netkosningu verður viðráðanlegt.

6.4. Stjórnarfundir eru eini vettvangur stjórnar til að fara með vald sitt, þó getur hún á milli stjórnarfunda falið stjórnarmönnum og öðrum félagsmönnum að fara með hluta síns valds. Stjórnarfundur skal vera að lágmarki einu sinni í mánuði. Að auki getur þriðjungur stjórnar boðað til stjórnarfundar. Til stjórnarfundar skal sannanlega boða með sólahrings fyrirvara. Í stjórnarfundsboði skal koma fram dagskrá fundar. Á stjórnarfund skal boða auk stjórnar, varamenn, þingmenn, varaþingmenn og framkvæmdastjóra sem áheyrnarfulltrúa og auglýsa fundinn á vefsíðu hreyfingarinnar. Almennir félagsmenn hafa seturétt á stjórnarfundum sem áheyrnarfulltrúar. Til að ákvarðanir stjórnarfundar séu lögmætar skulu að lágmarki 2/3 hluti stjórnar sitja fundinn. Fundargerðir stjórnarfunda, þar með talið fundir stjórnar og þinghóps, skal birta á netinu strax að fundi loknum og athugasemdir við þær skulu vera opinberar. Stjórnarfundir skulu hljóðritaðir og upptökurnar varðveittar á skrifstofu hreyfingarinnar.

7. grein. Samráðsfundur þinghóps og stjórnar.

7.1. Samráðsfundur stjórnar og þinghóps skal haldinn innan tveggja vikna þegar meirihluti stjórnar eða þingflokks telur þörf á. Þar skal fjall um afstöðu hreyfingarinnar og samræma málflutning hennar innan þings og utan í meiriháttar pólitískum stefnumálum. Í fundarboðinu skal koma fram dagskrá fundar. Á samráðsfundunum hafa meðlimir stjórnar og þinghóps auk seturéttar, málfrelsi, tillögurétt og atkvæðarétt. Til að ákvarðanir samráðsfundanna séu lögmætar skulu að lágmarki 2/3 stjórnar og þinghóps sitja fundinn. Það sem kemur fram á fundinum skulu fundarmenn halda trúnað um nema að það brjóti gegn stefnu hreyfingarinnar, tilgangi hennar eða lögum þessum.

V. KAFLI

Félagsfundur
8. grein. Félagsfundur.

8.1. Aðalfundur felur félagsfundi Borgarahreyfingarinnar eftirfarandi hlutverk og valdsvið:

8.1.1. Félagsfundir skulu vera vettvangur umræðna og miðlunar upplýsinga. Félagsfundir geta boðað einstaka félagsmenn á sinn fund. Skulu þingmenn, varaþingmenn, stjórnarmeðlimir, varastjórnarmeðlimir, umboðsmenn málefnasviða, tengiliðir vinnuhópa og aðrir sem gegna trúnaðarstöðu innan hreyfingarinnar hlíta boðinu ef þeir hafa tök á.

8.1.2. Félagsfundir skulu samþykkja framboðslista, sbr. grein 11.2 og 11.3.

8.1.3. Félagsfundir skulu hafa eftirlit með ráðningu starfsfólks, sbr. grein 13.

8.1.4. Félagsfundir skulu leysa úr ágreiningsmálum innan hreyfingarinnar og reyna í hvívetna að leita sátta. Félagsfundir hafa vald til að skipa til þess sáttanefnd. Sýnist félagsfundi sáttaleiðin ófær hefur hann vald til að áminna félagsmenn og/eða lýsa á þá vantrausti. Tillögur um áminningu og/eða vantraust skulu vera skriflegar, útskýra ástæður og undir hana skulu skrifa þeir sem eru með og þeir sem eru á móti. Stjórnin skal framfylgja ákvörðun fundarins.

8.2. Félagsfundir skulu vera að lágmarki fyrsta fimmtudag í hverjum mánuði. Þinghópur skal boða til félagsfundar og hitta félagsmenn að lágmarki einu sinni í mánuði. Að auki getur stjórn og þinghópur boðað til félagsfundar. Til félagsfundar skal sannanlega boða með tveggja sólarhringa fyrirvara. Fundarboð skal sent á félagaskrá og fundurinn auglýstur á vefmiðlum hreyfingarinnar. Í félagsfundarboði skal koma fram dagskrá fundar, sem skal ávallt innihalda önnur mál. Dagskrá félagsfunda fyrsta fimmtudag í mánuði skal að auki innihalda skýrslu stjórnar. Á félagsfundum hafa allir félagar Borgarahreyfingarinnar seturétt, málfrelsi, tillögurétt og atkvæðarétt. Til að ákvarðanir félagsfunda séu lögmætar skulu að lágmarki fimmtán meðlimir sitja fundinn. Fundargerðir félagsfunda skal birta á netinu strax að fundi loknum og athugasemdir við þær skulu vera opinberar.

VI. KAFLI

Vinnuhópar og málefnasvið
9. grein. Vinnuhópar.

9.1. Aðalfundur felur vinnuhópum Borgarahreyfingarinnar eftirfarandi hlutverk og valdsvið:

9.1.1. Vinnuhópar eru vettvangur félagsmanna til að vinna að stefnumálum og skipulagi hreyfingarinnar. Félagsmenn geta á félagsfundum stofnað vinnuhópa um öll málefni sem þeim þurfa þykir. Aðild að vinnuhópum er opin öllum félagsmönnum. Vinnuhópar geta starfað innan sjö mismunandi málefnasviðum sbr. grein 10.1.1. eða starfað utan þeirra. Meðlimir vinnuhópa kjósa úr sínum röðum tengilið sem hefur umsjón með starfi hópsins og sér um samskipti hópsins út á við. Tengiliðir vinnuhópa skulu halda umsjónamanni síns málaefnasviðs upplýstum um starfsemi hópsins.

10. grein. Málefnasvið.

10.1. Aðalfundur felur málefnasviðum Borgarahreyfingarinnar eftirfarandi hlutverk og valdsvið:

10.1.1. Málefnasvið eru samvinnuvettvangur vinnuhópa og þinghóps. Málefnasviðin eru sjö talsins: atvinnumálasvið, efnahagsmálasvið, innanríkismálsvið, menntamálasvið, umhverfis- og samgöngumálasvið, utanríkismálasvið og velferðarmálasvið. Aðild að málefnasviðum er opin öllum vinnuhópum hreyfingarinnar. Á aðalfundi skal kosinn umsjónamaður og annar til vara fyrir hvert málefnasvið. Umsjónamenn skulu hafa umsjón með starfi vinnuhópa á sínu málefnasviði og vera tengiliðir þeirra við þinghóp. Umsjónamenn skulu kynna hópastarfið á félagsfundi í það minnsta einu sinni í mánuði og samstilla starf allra málefnasviða í það minnsta ársþriðjungslega með aðstoð framkvæmdastjóra.

10.2. Málefnasvið og þinghópur skulu funda að minnsta kosti ársþriðjungslega. Á haustin fyrir þingbyrjun, á veturnar fyrir lok jólafría og á vorin eftir þinglok. Til fundanna skal þinghópur boða með minnst tveggja vikna fyrirvara, eftir samráð við umsjónamenn málefnasviðanna. Fundarboð skal sent á meðlimi vinnuhópa, umsjónamenn málefnasviða og þinghóp, og fundurinn auglýstur á vefsíðu hreyfingarinnar. Í fundarboði skal koma fram dagskrá fundar, sem skal innihalda skýrslu þinghóps, skýrslu málefnasviða og samstillingu starfs þeirra. Þinghópur getur kallað eftir fundi með málefnasviðum eða vinnuhópum þegar þeim þurfa þykir. Á fundum málefnasviðanna hafa þingmenn, allir meðlimir vinnuhópa og umsjónamenn þess sviðs seturétt, málfrelsi, tillögurétt og atkvæðarétt. Það sem kemur fram á fundinum skulu fundarmenn halda trúnað um nema að það brjóti gegn stefnu hreyfingarinnar, tilgangi hennar eða lögum þessum.

10.3. Umsjónamenn allra málefnasviða skulu funda með framkvæmdastjóra og stjórn eftir fundi með þinghópi. Til fundanna skal stjórn boða með minnst tveggja vikna fyrirvara, eftir samráð við umsjónamenn málefnasviðanna. Fundarboð skal sent á félagaskrá og fundurinn auglýstur á vefsíðu hreyfingarinnar. Í fundarboði skal koma fram dagskrá fundar, sem skal innihalda skýrslu málefnasviða og samstillingu starfs þeirra.Fulltrúar málefnasviða, framkvæmdastjóri og stjórn hafa auk seturéttar, málfrelsi, tillögurétt og kosningarétt. Almennir félagsmenn hafa seturétt á fundunum sem áheyrnarfulltrúar. Fundargerðir fundanna skal birta á netinu strax að fundi loknum og athugasemdir við þær skulu vera opinberar.

VII. KAFLI

Frambjóðendur
11. grein. Frambjóðendur.

11.1. Aðalfundur felur frambjóðendum Borgarahreyfingarinnar eftirfarandi hlutverk og valdsvið:

11.1.1. Hlutverk frambjóðenda er að koma stefnumálum hreyfingarinnar á framfæri.

11.1.2. Frambjóðendur Borgarahreyfingarinnar skulu skrifa undir eftirfarandi heit:
Ég (fullt nafn frambjóðanda) heiti því að vinna eftir bestu getu að stefnu hreyfingarinnar eins og hún er samþykkt á landsfundi. Gangi sannfæring mín gegn meginstefnu hreyfingarinnar mun ég leitast eftir því að gera félagsfundi grein fyrir því og leggja í dóm félagsfundar hvort ég skuli víkja sæti við afgreiðslu þess máls

11.2. Allir félagsmenn geta gefið kost á sér á framboðslista í hvaða kjördæmi sem er. Framboðsfrestur rennur út átta vikum áður en skila þarf framboðslistum til kjörstjórna. Þegar framboðsfrestur rennur út skal kosningastjóri kanna í hvaða kjördæmi og sæti frambjóðendur vilja bjóða sig fram, og gera drög að framboðslista eftir þeirra óskum. Eigi síðar en átta vikum fyrir kosningar skal kosningastjóri boða til félagsfundar sem ákveður endanlega uppröðun framboðslistana. Í fundarboði skal koma fram dagskrá fundar og drög að framboðslistum. Á fundinn skal boða alla félagsmenn sem auk seturéttar hafa málfrelsi, tillögurétt og kosningarétt. Við ákvörðun á uppröðun framboðslist skal félagsfundur starfa í anda jafnræðis hvað varðar kyn, aldur og búsetu. Ef alþingiskosningar bera brátt að má kosningastjóri í samráði við stjórn hliðra til tímamörkum eins og nauðsyn krefur.

11.3. Dagskrá félagsfundar sem ákveður framboðslista:

1. Kosning fundarstjóra.
2. Kynning á drögum framboðslista.
3. Umræður um uppröðun framboðslista.
4. Breytingar á framboðslistum.
5. Kosning um framboðslista.

VIII. KAFLI

Þinghópur
12. grein. Þinghópur.

12.1. Aðalfundur felur þingmönnum Borgarahreyfingarinnar eftirfarandi hlutverk og valdsvið:

1.1. Hlutverk þingmanna er að ná fram lýðræðisumbótum á Íslandi samkvæmt opinberri stefnuskrá hreyfingarinnar, með laga- og stjórnarskrárbreytingum sem miða að gagngerri endurskoðun á íslenskri stjórnskipan og kosningalöggjöf, til að ná fram virkri þátttöku borgaranna, valddreifingu, gegnsæi og því að menn sæti ábyrgð, sbr. grein 2.

12.2. Fastir þinghópsfundir skulu vera að lágmarki einu sinni í viku á meðan á þing stendur. Að auki geta þingmenn Borgarahreyfingarinnar boðað til þinghópsfundar þess á milli. Til þinghópsfundar skal boða með sem lengstum fyrirvara. Til þinghópsfundar skal boða þingmenn, varaþingmenn og stjórn. Í þinghópsfundarboði skal koma fram dagskrá fundar ef mögulegt er. Á þinghópsfundum hafa varaþingmenn auk seturéttar, málfrelsi og tillögurétt. Sitjandi þingmenn hafa þar að auki atkvæðarétt. Stjórnarmeðlimir hafa seturétt sem áheyrnarfulltrúar. Til að ákvarðanir þinghópsfundar séu lögmætar skulu að lágmarki 2/3 þingmanna hreyfingarinnar sitja fundinn. Það sem kemur fram á fundinum skulu fundarmenn halda trúnað um nema að það brjóti gegn stefnu hreyfingarinnar, tilgangi hennar eða lögum þessum.

12.3. Samráðsfundur stjórnar og þinghóps skal haldinn sbr. grein 7.1.

12.4. Þinghópur skal markvisst nýta sér varaþingmenn hreyfingarinnar til undirbúnings frumvarpa, tengsla við málefnahópa og eftir föngum að taka sæti á Alþingi

IX. KAFLI

Starfsfólk
13. grein. Starfsfólk og laun.

13.1. Framkvæmdastjóri skal ráðinn til að sjá um daglegum rekstri hreyfingarinnar. Framkvæmdastjóri getur ráðið starfsmenn í samráði við stjórn. Allar launaðar stöður innan hreyfingarinnar skal auglýsa opinberlega. Stjórnin skal meta umsækjendur á faglegum forsendum, og gera grein fyrir tengslum trúnaðarmanna hreyfingarinnar við umsækjendur sem verða fyrir valinu, ef einhver eru. Ráðningu starfsfólks skal aðeins gengið frá að undangenginni kynningu og samþykkis félagsfundar.

13.2. Laun framkvæmdarstjóra skulu vera þrefaldur lægsti taxti ríkisstarfsmanna og engin launataxti skal vera lægri en eins og hálf faldur lægsti taxti ríkisstarfsmanna.

X. KAFLI

Fjárreiður
14. grein. Fjárreiður.

14.1. Aðalfundur felur stjórn Borgarahreyfingarinnar að fara með firmaritun hreyfingarinnar sbr. grein 6.1.2. með eftirfarandi takmörkunum:

14.1.1. Borgarahreyfinguna má ekki skuldsetja

14.1.2. Þeir sem fara með fjárreiður hreyfingarinnar er einungis heimilt að leggja í útgjöld til að sjá um daglegan rekstur og kosningabaráttu hreyfingarinnar. Tekið skal sérstaklega fram að óheimilt er að nota fé hreyfingarinnar í nokkurs konar munað eða fríðindi.

14.1.3. Þeir sem fara með fjárreiður hreyfingarinnar skulu ávalt leita tilboða sem víðast.

14.1.4. Stjórn skal gera fjárhagsáætlun um nauðsynleg fjárútlát og fjárskuldbindingar hreyfingarinnar á komandi almanaksári og bera undir atkvæði aðalfundar. Vilji ný stjórn fara umfram fjárhagsáætlunina skal hún boða til auka aðalfundar og bera undir atkvæði hans.

14.1.5. Öll fjárútlát og fjárskuldbindingar umfram upphæð sem miðast við mánaðalega húsaleigu hreyfingarinnar þurfa undirskrift framkvæmdastjóra og gjaldkera.

14.1.6. Sýnist félagsmanni einhver þessara ákvæða brotin getur hann borið kæru sína undir dóm félagsfundar sem skal taka aftöðu til hennar. Þeir sem sæta kærunni geta áfríað dómi félagsfundar til næsta aðalfundar.

14.2. Bókhald Borgarahreyfingarinnar skal vera opið öllum og sýna hverjir styrkja hreyfinguna.

14.3. Öllu fé Borgarahreyfingarinnar skal sannanlega varið í samræmi við tilgang hennar. Þriðjungur af árlegum tekjum skal settur í kosningasjóð sé þess kostur

XI. KAFLI

Almenn ákvæði
15. grein. Almenn ákvæði.

15.1. Starfstímabil Borgarahreyfingarinnar er almanaksárið.

15.2. Við val fulltrúa í ráð og nefndir á vegum Borgarahreyfingarinnar og þinghóps hennar skulu fulltrúar ekki gegna sömu trúnaðarstörfum lengur en fjögur ár alls.

15.3. Einfaldur meirihluti skal ráða úrslitum í sérhverju máli innan Borgarahreyfingarinnar, nema annað sé kveðið á um í lögum þessum.

15.4. Í upphafi hvers fundar sem skal hljóðrita samkvæmt lögum þessum skal fundarstjóri lýsa því yfir í heyranda hljóði að fundurinn sé hljóðritaður.

XII. KAFLI

Félagsslit
16. grein. Félagsslit.

16.1. Þegar tilgangi Borgarahreyfingarinnar er náð eða augljóst er að honum verði ekki náð hyggst hreyfingin hætta starfsemi og leggja sig niður. Þessari grein má einungis breyta með einróma samþykki aðalfundar.

16.2. Ákvörðun um slit Borgarahreyfingarinnar verður tekin á aðalfundi með 3/4 hluta fundarmanna. Við slit hreyfingarinnar skal skila afgangsfé til þeirra sem lögðu það til, í hlutfalli við framlög þeirra. Þessari grein má einungis breyta með einróma samþykki aðalfundar.

XIII. KAFLI

Lagabreytingar
17. grein. Lagabreytingar.

17.1. Lögum Borgarahreyfingarinnar má aðeins breyta á aðalfundi. Breytingartillaga telst samþykkt ef hún hlýtur 2/3 greiddra atkvæða á aðalfundi, nema annað sé tekið fram í lögum þessum.

17.2. Allar tillögur til breytinga á lögum þessum skulu sendar til stjórnar eigi síðar en tveimur vikum fyrir boðun aðalfundar. Stjórn skal sannanlega birta breytingartillögurnar á heimasíðu hreyfingarinnar eigi síðar en sex vikum fyrir þann aðalfund sem þær skulu teknar fyrir á.